ԱՐՓԱ Կինոփառատոն

«Մեդալի հակառակ կողմը» ֆիլմը, որի ռեժիսորն է Աննա Մաքսիմը, հաղթող է ճանաչվել Հոլիվուդում անցկացվող ARPA միջազգային կինոփառատոնի «Լավագույն լիամետրաժ ֆիլմ» անվանակարգում: Ֆիլմը ընդգրկված էր փառատոնի հիմնական մրցութային ծրագրում և անմիջապես ուշադրություն գրավեց ժյուրիի կողմից՝ մարդկային պատմությունների խորն ու անկեղծ ներկայացմամբ, հետաքրքիր սյուժեով և հիանալի դերասանական աշխատանքով:

Փառատոնի շրջանակում ռեժիսոր Աննա Մաքսիմը արժանացել է նաև հատուկ «Ծագող աստղ» (Rising Star) մրցանակին՝ որպես նոր սերնդի խոստումնալից կինոռեժիսոր, ինչը հստակ վկայում է նրա միջազգային ճանաչման ու կինեմատոգրաֆիական նորարարության մասին:

ARPA միջազգային կինոփառատոնը, որը տեղի է ունենում Լոս Անջելեսում, համարվում է հեղինակավոր անկախ կինոփառատոններից մեկը, այն առանձնանում է ոչ միայն մշակութային բազմազանության խթանմամբ, այլ նաև նոր հեղինակների միջազգային հարթակում ներկայացմամբ։ Փառատոնն ակտիվորեն աջակցում է անկախ կինոռեժիսորներին և խթանում ստեղծագործական ազատությունը:

«Մեդալի հակառակ կողմը» - ի հաղթանակը ARPA փառատոնում կարևոր ձեռքբերում է ինչպես ֆիլմի, այնպես էլ ռեժիսոր Աննա Մաքսիմի ստեղծագործական ուղու համար, քանի որ այն ամրապնդում է նրա դիրքը որպես միջազգային կինեմատոգրաֆիայի հետաքրքիր ու խոստումնալից ներկայացուցիչ: